انا عصبت, مشان هيك بمناسة الشهر الفضيل قررت اشتري شوية شجاعة واطلب هالطلب, من اصدقائي, ويلي مو على صفحتي رح وزع منشورات مطبوعة مشان ما يصير سوء تفاهم.

يلي بتخالجه احيانا فكرة انو هوي اهم واحق بالحياة من باقي البشر, او بيحقله اشياء ما بتحق لغيره , لاي سبب: دينه, جنسه, عمره, خلفيته الاجتماعية او الثقافية, او او او (من دون ماعد بس هني موجودين بوثيقة حقوق الانسان) وضيف عليون يلي مو موجود: الميول الجنسية, مستوى الثقافة, طبيعة العمل, الوزن, مستوى الجمال, الاحتياجات الخاصة, الخصوبة, الامراض, معدل الذكاء!

يمكن هالشخص يلي عنده من هي المواصفات يلي عديتها احسن مني ومنك بكتير شغلات, احسن بالمحبة, والسلام, والفرح, والغيرية, والصبر, والالتزام, والتواضع, هدول شغلات اهم للكرة الارضية من رايي ورايك فيه.

هالموضوع بالنسبة الي هوي مبدأ يعني غير قابل للمناقشة, يعني لابسني مو انا لابسته, وكمان بيعني انو ما تحاول تفتح اصلا هيك موضوع تحت لافتة, انو وانت عالم مثقفين وبالتالي لازم كون مرنة واسمع وجهة نظرك, لان عفن الفكرة بيطلع كل التوحش تبع قبيلتي كلها من اربع قرون لليوم, واذا خلص يلي عندي بشتري غيره.

هالفكرة هي بالذات, ناقشها العالم وركز عليها بعمق, وحاول يطبقها بالصرماية من القرن ال17 لليوم, وعدد يلي ماتو وعم يموتوا بيتجاوز المليار, وانت نفسك بتبكي على "جزء" منون لان الباقي ما بيهموك, لليوم في اجزاء من اوروبا ومن اسيا ممنوع الاقتراب منها بسبب التلوث الاشعاعي او الكيميائي, لليوم في اطفال عم تولد مشوهة, لليوم في بنات ما بتروح عالمدرسة لان كونها بتجيها الدوره فهيي ملعونه ووسخة ومانا طاهرة, وباحسن الاحوال محط سخرية.

ما بعرف وين كنت بالضبط خلال هالتاريخ هيدا بس شوف اذا فيك ترجع بالزمان وتدلي بدلوك, ومن دون ما تفتح تمك معي انا بالذات!

حتى يلي هوي نوعا ما مفتح بس فاقد للموضوعية حسب هوية المجرم والضحية.

عن جد يلي بيشوف انو مذبحة الارمن والسريان, والهنود الحمر , والاستراليين الاصليين, وسفر برلك, والقضية الفلسطينيه هني جريمة ابادة جماعية, بس ما بيشوف انو يلي عمله هتلر كمان جريمة ابادة جماعية وانو هوي مجرم, على نفس الاساس يريح حاله مني

هي من دون ما انسى العالم يلي ما بيشوفوا انو المجزرة الارمنية السريانية جريمة, بس بعدون لليوم عم يعزفوا عالحروب الصليبية!

ويلي بيشوف انو يا حرام اليابان انضربت قنابل نووية بس كمان ما بيشوف انو الصين خضعت لابشع الجرائم بحق مدنييها من اليابان, كمان يرتاح مني

يلي بيشوف انو داعش هي صاحبة اسوا جرائم عبودية, ويحط الحق عالدين مو على داعش وبينسى او ما بيحاول يعرف انو الانجيل استخدم لتبرير اشنع جرائم عبودية بالتاريخ للافارقة لا يعلق معي.

لليوم الانجيل بعده عم يستخدم للتحريض على المثليين, والشماتة بالموت وتبرير الارهاب والجريمة!

الانجيل يستخدم لليوم للحط من المرأة واضطهادها, وتزويجها كطفلة, (بالاحرى اغتصاب القصر) وتعدد الزوجات ومنع المراة من التعليم, (وهي باميركا) واجبارها على الانجاب, هي بالذات اخر وحدة اسال عنها البابا.

يلي بيشوف التصفية يلي عم تعملها داعش ضد الانسان يلي بيخالفون وما عم يشوف كل هالانظمة التقدمية والممانعة والمقاومة كيف صفت الحزب, او الاثنية او القومية المخالفة او الفكر المخالف, لاء وعملت هالجريمة جزء من دستور البلد يلي حاكمته, كمان رح يناله طرطوشة.

يلي بيشوف انو التفجيرات بالمدن يلي بتخصه او بتهمه جريمة وارهاب وما شاف ولا بيشوف انو تفجيرات نيويورك وبوسطن وباريس وووووو تبع هدوك العالم, انو هي كمان جريمة وارهاب ويلي ماتوا مدنيين واطفال وكمان ابرياء وما الون ذنب, كمان لا يحاكيني, انا كنت بسوريا يوم تفجيرات نيويورك, وعندي اصدقاء بيشتغلوا بنفس المنطقة وماعم اعرف اتطمن عليون, وعم اتفرج عالعالم الفرحانة والشمتانة كان موت الانسان هوي شغلة بتفرح.

الجريمة جريمة, بغض النظر مين الضحية! ولا انت فيك تنطر ليصير ابنك او بنتك ضحية لحتى توجعك ووقتا بتصرخ؟ ووقتا بتسال حالك ليه ما حدا سمعني؟ بس ما رح تتذكر انو انت ما سمعت صرخة الانسان التاني, هداك يلي بيختلف عنك بكل شي الا بكونه مرايتك بالانسانية.

رح ضيف شغلة اخيرة بما انو انفلتت, يلي متخيل انو تدمير الآثار والحضارة وحظر واللغات وتدمير البيئة وقتل الحيوانات وتعذيبها هوي مانو جريمة, وموضوع مبرر تحت واقع معين كمان لا يغلب حاله معي, هدول بالحقيقة هني جزء من الابادة الجماعية, تدمير حضارة او اقتصاد الانسان هوي تدميره.

للاسف انا ما بتردد كتير قبل ما اخد قرار نهائي بخصوص وجود انسان بحياتي بما يخص هالموضوع.