#نقطة_ببحر :

كان في شب من الغوطة دمه خفيف اسمه عمران عمره بالعشرينات

عندو طموح كبير بالحياة و بيحب الفن و المسرح .. بيقول شعر محكي و بيغني

بيكتب خواطر و قصص صغيرة ...

عمران شعلة عنفوان و حماس ... كان يخاطر بحياته كرمال يوصل لقمة أكل او علبة دوا للمحتاج من المدنيين ... يقضي سهراته تحت السما على ضو النجوم و هوه عم يسمع فيروز و يغني معها مع انو صوت الرصاص كان عالي كتير ...

مرحبا امي ...

عم ابعتلك قبل مااطلع لقلك لا تقلقي عليي اذا طولت لأرجع .. الطريق صعب كتير

انا بس ارجع ببعتلك ...

غاب 6 ساعات كأنهن سنه ... و رجع عمران ... رجع مبسوط و مرتاح أنو قدر يدخل الدوا رغم القصف و الملاحقات ..

عمران مابيفهم بالسياسة و لا بيعرف يحلل و يركب ..

يلي بيعرفه بس انو جيرانه و أهله يلي ربي معهن و اكل من خبزاتهن ... بحاجته

امي ..

لاتخافي انا رح غيب شوي و رح سكر كل اتصالاتي .. اليوم اعتقلوا رفقاتي و يمكن جاييني الدور ... لاتخافي اي ؟ .. لا تخافي ...

و اختفى عمران ... اختفى الشب الظريف الفنان البسيط الانسان يلي مابيفهم سياسة و لا بيعرف يحلل و يركب و يتفلسف ...

اختفى عمران بشهر 8 - 2013 و اجت بداله غصة بالحلق و الروح و القلب ..

غصة كبيرة ماعم تنبلع ... ضلت كلماته براسي عم تحاول تطمني ..

لا تخافي اي ؟ ... لا تخافي ... بس انا خفت ..

خفت لأنه صرله 3 سنين و مافي عنه خبر ...

ناس قالوا انو خلص ماعاد يرجع ...

و ناس قالوا لأ لساته موجود وعايش ...

آخ يا ابن الروح ... قديش غيابكن بيوجع ... صوتك لهلق بيجرح القلب

سلام لروحك ان كنت عايش أو ....

سلام ياامي ...