أنا تعباااانة
تعبانة من حال الناس الماشية بالشارع بتحكي مع حالها !!
تعبانة لأني صرخت بوجه طفل كان عم يقلي خالتو اشتري مني علبة شوكولا!!
لأني والله كنت تعبانة ، ومن كتر ما كنت مقهورة عليه صرخت بوجهو ، ورجعت و بسته .. ودمعت !
تعبانة من الشب اللي بيجيك على جنب بيحكيلك : بالله تعطيني أجار الطريق لو معك ، لأنو مصاريي وقعوا مني ..
هو ما وقع منه شي ، هو مش قادر يحكيلك والله ما معي آكل !!
لسا في شوية كرامة منعتو من هالكلمة
تعبانة من الشوفير اللي عمره فوق 60 سنة ، وبيشتغل طول اليوم على السيارة وبيمسح عرقه بالمنشفة ويمكن مش عرق يمكن دموع !!
وركبته بتوجعه
تعبانة من رفيقتي اللي بتنام للمغرب ، لأنو فقدت الأمل بالحياة !
وبتقلك الانتحار حرام !
فبتنتحر بطريقة حلال !!
تعبانة من حالي اللي مش قدرانة تتأقلم مع أي شي بالبلد !!
لك أنا اللي كنت بخلي الحجر يضحك !!
تعبانة من معاملة العرب لأهل بلدي وكرامتهم المسفوحة عالحدود وبالملاجئ وبالخيم
تعبانة من منظر الشب اللي لما حدا بيقلوا ليش ما تزوجت ؟! بيبتسم هديك الابتسامة اللي بتقطع القلب وبيقول إن شاء الله قريب ، وهو ما معو حق باكيت دخان ...
تعبانة من منظر البنت إللي بتكلف حالها باللبس والكلام وترتيب شكلها حتى تلفت نظر شب ويصير عريس ، لأنه المجتمع وأهلها ملّوا منها
تعبانة من حالة ولاد بلدي اللي وصلولها
تعبت من منظرن وهن عم ينهشوا بلحم بعض وياكلوا بعض ويدوسوا عبعض
الله يفرج عنك يا بلد ......
كلنا تعبنا #الله يفرج عنك يابلد