كأنو كوهين لسا عايش ؟
الأربعاء 21 يونيو / حزيران 2017 19:12
أسامة الأطرش
كأنو كوهين لسا عايش ؟
بالصدفة قرأت قصة ايلي كوهين
ايلي كوهين الجاسوس الاسرائيلي اللي كان بسوريا بفترة الستينات وصار مستشار وزير الدفاع وعلى نكشة كان استلم رئيس سوريا . بس الحمد لله كشفوه بآخر لحظة واعدموه بساحة المرجة .
عم اتخيل لو ما كشفوه ووصل للرئاسة
يااااا سلام ، جاسوس اسرائيلي رئيس دولة عربية
شي بيرفع الراس
عم اتخيل شو ممكن يعمل لو استلم رئيس
اكيد كان عمل جهدو يخرب سوريا بالكامل ، بس بكل سريّة مشان ما ينكشف امره .
كان بداية خرب القضاء بسوريا ودخل الرشاوي للمحاكم ودوائر الدولة .
وكان خرب اقتصاد البلد بمشاريع للدولة خسرانة
وكان عمل جاهداً مشان ما يوفر امان للمسثمرين العرب والاجانب ، بتدخيل حيتان من طرفه تستولي على اموال البلد.
اكيد كان جاب كل الناس الفاسدة والمفسدة وحطهن حوليه وسلمهن امور البلد.
اكيد كان رح يعادي اسرائيل بالظاهر مشان ما يلفت نظر ، ورح يطبع معها تطبيع تام بالباطن .
واكيد اذا الشعب قرر يثور عليه رح يقمعه ويبيده ويستغل حالة الفوضى ليدخل عالبلد كل شركاؤه ليكمل مشروعو واكيد كان دمر البلاد بالبراميل وهجر الشباب واعتقل واغتصب النساء وشرد الشيوخ ولاطفال وحرق المعامل ودمر الزرع والاثار والحضارة .
الحمد لله الف الحمد لله اللي كشفوه وما وصل للرئاسة .



أخر ما نشر