سامحوني اذا نسيت
الجمعة 8 سبتمبر / أيلول 2017 19:39
نورس محمد
سامحوني اذا نسيت

حكايتي مع ذاكرة السمك

عندي مشكلة مع الذاكرة. من وقت ماخلقت وريكوردر الذاكرة عندي عاطل عن العمل. بقرأ رواية لما اصل لنصها بنسى احداث النصف الأول. بشوف فيلم، بنهاية الفيلم مابتذكر أي شي من الفيلم ولا حتى العنوان. واحيانا بشوف نفس الفيلم مرات كتيرة وبفترات متباعدة وكل مرة بشوفه وكأني بشوفه لأول مرة. بشوف مباراة رياضية وكلي حماس، بنهاية المباراة مابتذكر غير عدد الأهداف وتاني يوم الأهداف بينمسحو من الذاكرة. صرلي ساكن بنفس البيت 9 سنوات والى الأن ماقدرت احفظ اسم محطة الباصات ورا بيتي مع اني بمر امامه بشكل شبه يومي. لما اروح للسوبرماركت لأشتري قهوة، بجيب كيس مشتريات وبنسى القهوة. برجع بروح مرة تانية وبرجع بكيس مشتريات مرة تانية وبنسى القهوة. بسجل قائمة مشتريات على ورقة، بنسى الورقة.

قبل فترة قريت ساق البامبو، عابر سرير، القوقعة للمرة الثانية، رواية من أمريكا اللاتينية ورواية لروائي مصري. كلهم انمسحوا.

حشيت مخي بأطنان من المعلومات وكتب وروايات وسيناريوهات ومئات الأفلام وستة لغات. مع تلات لغات برمجة للكومبيوتر واربع لغات برمجة للانترنت. سينما، مسرح، مهرجانات سينمائية، ندوات ثقافية وامسيات شعرية. كلهم تبخروا ومابقي غير تلات لغات مكسرات. لما احتاج كتابة جملة بستخدم المدقق الاملائي. حتى القرآن ختمته عدة مرات ومابتذكر منه غير الفاتحة.

أصدقاء أيام الطفولة والدراسة نسيت أسمائهم ووجوههم. أسماء المدرسين والمدارس وكتب الدراسة كله بح. مابتذكر غير ومضات من أيام الطفولة والشباب.

أيام الدراسة الاعدادية والثانوية كنت كل ما انجح بصف انسى مواد الصف اللي قبله. وهالشي سببلي احراج كتير مع الجيران. لاني كنت اخد العلامات التامة بالرياضيات والفيزياء والكيمياء. وأهالي ولاد الحارة كانو يبعتوا ولادهم لساعدهم بحل الوظائف. اذا ماساعدتهم باكل بهدلة واذا ساعدتهم باكل بهدلة لانه الحل كله خطأ.

ماخليت شي يفيد الذاكرة والا جربته. اشرطة كاسيتات لامواج البحر، اليوغا، الاكل الصحي فواكه وخضراوات ومكسرات وفيتامينات وحبوب خينكو بيلوبا وجنسينغ وموسيقا هندية وصينية مبرمجة عالهرتزات. والريكوردر رافض يشتغل.

هالشي ساوالي مشاكل نفسية ومادية ومعنوية ودراسية بحيث ماقدرت اتابع الماجستير بالاقتصاد ومواقف محرجة كتيرة مع الاهل والأصدقاء والزبائن وحاليا أصدقاء الفيسبوك. وسببلي اكتئاب وصرت انطوائي وابتعدت عن كل الناس وحبست حالي ببيتي لا زور حدى ولا ادعوا حدى لبيتي واعتذرعن حضورالندوات الثقافية وقاطعت السينما والتلفزيون. وصرت فقط اتعامل مع الزبائن عن طريق الايميل والتلفون وبعض الزيارات لعندهم.

حتى اللاجئين السوريين ماقربت منهم مع انهم بحاجة لمساعدة ولكني معرفيا وماديا مفلس وبنفس الوقت مابدي أوقع بلسانهم حسب ماعم اسمع من الناس اللي عم يتعاملوا مع اللاجئين السوريين في نسبة لابأس فيها منهم مقرفين بحيث صاروا يتمنوا انه الحيوان السوري يرجعهم على سوريا ليرتاحوا منهم.

لما صارت الثورة المباركة فتحت صفحة فيسبوك وطاير من الفرح وتعرفت على أصدقاء جدد. صرت اكتب قصص قصيرة من وحي الثورة وانشرها عالفيس. كان يلاقوا اعجاب الأصدقاء وغير الأصدقاء. وصارت تصلني رسائل اعجاب على الخاص ومنهم رسالتين من مناف طلاس متل ماذكرت سابقا. مناف كان يرسل رسالة وحدة فقط بينما اغلب الأصدقاء بتابعوا المراسلة وحابين يعرفوا اكتر عني ولما يصل الموضوع للثقافة والادب بوقف المتابعة. لحتى ما أوقع بموقف محرج وينصدم صديقي الفيسبوكي. وصارت تصلني رسائل غاضبة وتأسف. المثقف لازم يكون متواضع، انزل من برجك العاجي، نزلت من عيوني، خيبت املي فيك الخ الخ وتلميحات ساخرة على صفحات بعض الأصدقاء. المثقف العبقري الكبير أبو (م) عم يحفر بأنفه مو فاضي يرد. مثقف أبو بيجامة ببدلة، فقاعة صابون الخ الخ.

ومن الأشخاص اللي وصلتني منه رسالة غاضبة ابن الفنان الحرعلي فرزات (مخرج نسيت اسمه) الغى صداقته وعملي بلوك.

وأيضا من الأصدقاء العزيزين جدا والله يرحمه ويجعل مثواه الجنة. محمد قارا صديق اغلب الشراكسة. كان من المعجبين جدا بكتاباتي. كنا ندردش بين فترة وفترة عن الوضع بسوريا ولما وصل النقاش عن الادب والثقافة وقفت. المرحوم محمد كان يحمل في دماغه مكتبة كاملة من المعرفة بينما انا دماغي ورقة بيضاء. وصلني خبر لاحقا انه اخد على خاطرو مني. الله يرحمك يامحمد ويجعل مثواك الجنة ولما نلتقي في مكان ما في الاخرة رح خبرك ليش توقفت عن الرد على رسائلك وممكن تعذرني.

وأيضا تعرفت خلال الثورة على صديق رائع وخدوم وهو من القلائل اللي وقفوا معي لما احتجت المساعدة ولكنه صعب المزاج ياويله ويا سواد ليله اللي بيغلط معه حتى ولو غلطة غير مقصودة. بينشر عرضه عالفيسبوك من غير مايسأل ليش عملت معي هيك. ولما يطلب مني شي وانسى بيرسلي رسائل حارقة مارقة بحيث صرت اقرأ المعوذات كل ما افتح المسنجر أو الواتس اب.

صار الفيسبوك يسببلي عبئ نفسي وفكرت مرات كتيرة اسكره ولكني ادمن لصفحات كتيرة وعندي التزامات مع أصدقاء.

لذلك عزيزي وصديقي الفيسبوكي انا بحياتي ما اعتبرت نفسي مثقف انت عطيتني هاللقب وانتقدتني بناءا عليه. عملت جهدي اني كون من مستواك ولكني ماتوفقت لذلك يا اما لاقيلي طريقة لتفعيل ذاكرتي يا اما بلاها منشوراتك عني. بكون سعيد جدا اذاعجبتك منشوراتي واكتر سعادة اذا ما بتئذيني بكلامك.

صحيح كتبت سيناريوهات بالانجليزي وراسلت هوليود وبي بي سي وبنفسي اكتب سيناريو عن القيصر.
كتبت ومازلت اكتب قصص قصيرة وخربشات شعرية واجمعهم حاليا بكتاب لانشرهم لما يتوفر عندي المادة (الفلوس).
كتبت أغاني. وليد توفيق اخد مني اربع أغاني وذهب مع الريح وميادة الحناوي عزمتني على حفلة وانا خربتها على حالي.
كتبت أغاني بالانجليزي وملحن هولندي لحن وحدة من الأغاني ومن ثم افترقنا لظروفي الخاصة
كتبت برنامج تلفزيوني وراسلت منتج برامج ذافويس، قالولي صعب تسويق هيك برنامج وبعد فترة شفت برنامج مشابه اله على التلفزيون الهولندي.
كتبت سكيتشات واغاني واخرجت حفل سنوي للطلاب السوريين في زغرب. ويومها اضحكت وابكيت الحضور وكان من افضل الحفلات اللي عملوها خلال سنوات طويلة بشهادة كافة الحضور.
جربت التمثيل أيام الجامعة ريتها تنذكر ما تنعاد.
كتبت مقالات عن التكنلوجيا في جريدة عراقية في المهجر.
شاركت بتدقيق اللغة العربية في مجلة مصرية في المهجر.

كل هالاعمل ظاهرها ثقافي ولكن في الواقع انا لست مثقف ولكن عندي مخيلة واسعة. ممكن من كلمتين اكتب قصة ومن تلات كلمات اكتب فيلم.

وأخيرا اصعب شي على الانسان انه يكون عنده طموح وماعنده ذاكرة ولا بسبورت. هالحاله بتخلي الواحد يجن ويصير عنده كآبه وممكن ينتحر.

ودمتم ذخرا لوطن حر



أخر ما نشر